Циклның беренче спектакле – «Муса. Моабит» (12+). Куючы режиссеры – Булат Гатауллин. Спектакль безгә таныш һәм таныш булмаган Муса Җәлил турында. Түзеп булмаслык шартларда да кеше булып кала алу мөмкинме? Шагыйрьлек һәм каһарманлык нәрсәдән башлана: әни сөтеннәнме, әллә чаңгыда йөрүдәнме? Бәлки, чит телләр өйрәнүдән яки туган илне яратудан? Шигърияте һәм исеме һәр татар кешесенең йөрәгендә сакланган Муса Җәлилне искә алыйк әле. Балачагы, үсмер еллары, шагыйрь булып өлгерүе, мәхәббәтен табуы, әти булу бәхете, кызы Чулпан... Без аның иҗатын каһарманлык һәм патриотлык үрнәге дип бәялибез. Үзен дә Герой дип беләбез. Ә нинди кеше булган соң ул? Һәм ни өчен аның шәхесе безне һаман да дулкынландыра? Әлеге һәм башка сорауларга җавапны «Муса.Моабит» шигъри-музыкаль спектаклендә эзлибез.

Циклның икенче спектакле – «Анна Ахматова: Вакыт кайтавазы» (12+). Режиссеры – Эльдар Гатауллин. «Анна Ахматова: Вакыт кайтавазы» спектаклендә тамашачылар, Анна Ахматова шигырьләренең ритмына кушылып, артистлар белән бергәләп, шагыйрәнең шигъриятендә урын алган катлаулы тормыш юлын кичәчәкләр. Аның иҗаты нигезендә яткан мәрхәмәтлелек һәм ярату фәлсәфәсен күңелләре аша үткәрәчәкләр. Анна Андреевнаның шигырьләре татар телендә яңгыраячак. Аның шигырьләрен бүгенге көн татар шагыйрьләре Илсөяр Иксанова, Рәмис Аймәт, Луиза Янсуар, Йолдыз Миңнуллина, Лилия Гыйбадуллина, Фәнил Гыйләҗев тәрҗемә иткәннәр. Тамашачы сүзләрнең тәрҗемәсен белмәсә дә, шигырьнең мәгънәсенә төшенәчәк, чөнки хисләрне җиткерү өчен сүзләр кайвакыт артык. Шагыйрәнең иҗатын тоеп аңларга, һичшиксез, артистлар ярдәм итәчәк.